Mat 7 | KZE | STEP | Ísu mináímbá simásuwena séna tuwánéꞋo éꞋa sáwí-kwaasiye siyanamó éna Áánútu kentáváígwáráꞋá mirá sínívo tuwánéꞋo éꞋa sáwí-kwaasiye sevó.

Matthew 7

íma sáwí-aimba simátíméro-kwasai.

Árúku 6:37-38, 41-42

1 Ísu mináímbá simásuwena séna tuwánéꞋo éꞋa sáwí-kwaasiye siyanamó éna Áánútu kentáváígwáráꞋá mirá sínívo tuwánéꞋo éꞋa sáwí-kwaasiye sevó. 2 kawer-áímbá kwésimatimeꞋa sáwí-aimba kwésimatimeꞋa íyantavena Áánútu kembá mirá íníye. tíménteniꞋa umái Áánútu miráumai timíníye. 3 kentúrampimba irarumbá kwáyáísaꞋo ombá íma awánaamba kentí kwaási tuwánéꞋa enaúrampimba ayaantambá kwáyáiye kwésevo íma mirá seró. 4 kentúrampimbo irarumbó ímo awánaamba nóra sera kentí kwaási túrampinkemba tiyaantambá maitiyuwánáe kwéseo. 5 kaumbo-káér-ainkwara-kwaasin-ovo kentúrampinkemba irarumbá maisukéꞋa tuwánéꞋa kentí kwaási túrampinkemba tiyaantambá kanaán-umai maitiyuwánááowe Ísu siráiye.

6 kawe-tántááꞋó iyánkómbó ímo áméntemba Áánútun-aai arááiraawaima íma simátíméro. simátimiyasamo ésa akáꞋáámba simátinkanaaowe. kawe-tántááꞋó póígombo ímo áméntemba Áánútun-aai íma sínkáiye kwésewaima íma simátíméro. simátimiyanamo éna mináínkó úndáraamba tokwíníye.

ÁánútumpaꞋa námúnaa kwésen-kwasai.

Árúku 11:9-13

7 Ísu séna ÁánútumpaꞋo námúnaamo kwésemba áísaa úmae kwéiyiyana timíníye. ááyamae kwéiyiyana kentáái isáníye. kwéavakaa úmae iyíyana Áánútu agaráátinkaniye. 8 áísaa íyanamo éna Áánútu timíníye. kwéaayewanamo éna Áánútu kentáái isáníye. avakáá íyanamo éna Áánútu agaráátinkaniye. 9 keinárawaꞋa iyámpóígwara-kwaasi kentáánimbaaꞋo kisaamá simiyómó síyaꞋo éꞋa íma óntan-amuꞋa timéꞋa kisaamá timénááowe. 10 noyááꞋa simiyómó síyaꞋo éꞋa íma iraankavayaambá timénááowe. 11 ánivo sáwí-kwaasi ombánivo kentáánimbaaꞋa kawe-tántááꞋá kwétimevo kwíyómpakemba kentáásivowa kaweré suꞋmai iwáí póna áísaa íyawaimo éna kawe-tántááꞋá timíníye.

12 kembó tirááímo táínda-iꞋo umáímo kwétuwaꞋnaa-iyaꞋa miwí miráumai túwaꞋnaa oro. mináímbó simátimunda Mósesi siráin-aine Áánútun-aai simátímakaawai siráan-aine minkáér-áínkóná ááimba kwésimatimune Ísu siráiye.

sáwíyan-ontaona kwaasái.

Árúku 13:24

13 Ísu séna kaer-óntámá kwáyáísaꞋa sáwíyan-ontavimba usáveraaro. anón-ontama anón-ankona ontamán-iye. Áánútuna némpaꞋo maíꞋmaiꞋo ónááon-ayampaꞋa minánón-ámpáꞋá kwégwesa sáwíva-kwaasi minóntávímbá kwégowe. 14 sáwíyan-ontama umbai-ánkóná ontamán-iye. aúnáiꞋo umáímo maíꞋmaiꞋo ónááon-ayampaꞋa minúmbáí-ámpáꞋá kwégwesa esimáí-kwaasiye suꞋmai minóntámá avakáá-umai awánésa kwéusaveraawe Ísu siráiye.

kampar-áímbá siráan-kwaasiti kwaasái.

Árúku 6:43-44, Árúku 13:25-27

15 Ísu mináímbá simásuwena séna évakarawai kampaꞋá simátimesa sésa Áánútun-aai simátimunda-kwaasi úne kwésewai miwí kárákwimai máéro. sipisípi-poigomo paru umáímo máíntemba miwí kampa-párú umái kwénaaombanivo kawer-ímáyáá sáwíꞋa kwéumatinkaan-kwaasin-owe. 16 miwítí ááimbo awánanaeꞋo éꞋa miwítí mayáí awánéꞋa miwímó máyáawaina ááimba awánaaro. tekómó éna íma áwí-yantaaꞋa iyánívo teꞋá iyáníye. ampaantarígoma avoꞋárén-aramba íma iyánívo ampaantarí-aramba iyáníye. 17 miráumai kawe-táígó kawer-árámbá íyáísana sáwí-taigo sáwí-aramba kwéiyaiye. 18 kawe-táígó íma sáwí-aramba íyáísana sáwí-taigo íma kawer-árámbá íyáísasa 19 kawer-árámbó ímo íyain-taima ayáímai iravimbá kwéagaisuwaawe. 20 miráumai minkámpá-kwáásítí mayáí awánéꞋa miwítí ááimba miráráán-umai awánanaaowe.

21 kentávésa kesí Ísóigoman-iye kwésewaigwaraꞋa Áánútu íma mútúꞋa kárákwinimba póna kesivo kwíyómpakewaimbo arááímo tainíꞋo kwéowairare suꞋmai kárákwiyiniye. 22 Áánútu amáparawai máyáawaina ááintavena tísaa ínín-kanaa tíndaraꞋa kentávésa sáwívarawai sésa Ísóigoo ená asirayándéí Áánútun-aai simátímakaumne. ená asirayándéí kwaási tirumpinkémbá taraváá-kwámbá maitíyukaumne. ená asirayándéí óꞋon-oꞋon-kaweꞋ-mayai ímo awánaraam-bayai mairáumne sénááombanivo 23 simátimeꞋa séꞋa íma kesí kwaási éꞋa sáwí-mayai kwémayaan-kwaasin-ovo kóro kemá sénaumne Ísu siráiye.

naambá kwéoyawairaiti kwaasái.

Árúku 6:47-49

24 Ísu mináímbá simásuwena séna kesáái isésa kwégwaraiyawaima mirán-kwáásímó simátíméndaraꞋa ísáaro. kawer-ímáyáágwárá-kwáásí asirayán-dámbá ónáe sésa maiꞋá uꞋmaésa kumémesa óntankaꞋa naamayáámba móru aimái naambá úmaraiyana 25 aaꞋá téna anón-kavirayan-domba kumínana mindámbá íma tawisínda asiramái kwéena óntankaꞋ-namba póna úwoi kwéniye. 26 ánivo kesááimo isésamo ímo kaweꞋó umáímo kwéisaiyawaima mirán-kwáásímó simátíméndaraꞋa ísáaro. naambá ónáe sésa íma maiꞋá ukésa íyamba nonáámááíraꞋa paákáꞋá úmakaiyana 27 anón-aꞋa téna kavirayán-dómbá kuména mindámbá tawísíyuwainana sáwíꞋa íníye Ísu siráiye.

28 Ísu mináímbá simátímatuwowasa torupamáímo máyón-kwaasi isésa 29 ámáámba sen-kwáásímó sentembá íma sivó anón-kwaasigoraamba siyé sésa táátavesa uráawe.